पालागौं कर जोरी, श्याम मोसों खेलौ न होरी।।
गउएँ चरावन कों हम निकसीं, सासु ननद की चोरी।
सिगरी चुनरि मोरी रँग में न बोरौ, एती अरज सुनौ मोरी,
कहूँ दोउ कर जोरी।।
छीनि झपटि मोरे हाथ सों गागरि, जोर सों बहियाँ मरोरी।
जिय धड़कत मोरी साँस चलति है, देह कँपै गोरी गोरी,
जाउ घर लाल बहोरी।।
अबीर गुलाल लपटि रह्यौ मुखसों, सारी रंग में बोरी।
सासु हजारन गारी देयगी, बलमा जियत न छोरी,
कहाँ विष खाय मरांरी।।
फाग खेलिकैं तुम मनमोहन, का गति कीन्हीं मोरी।
सखियनि बिच मेरी लाज गंवाई,अबहुँ करत बरजोरी,
जाऊँ कैसें ब्रज खोरी ।।